Астанада 11-12 шілде күндері сағат 09:00-ден 22:00-ге дейін ұлттық дәстүрлерге, мәдениетке және қазақтың ұлттық тағамдарына арналған халықаралық BaiQymyz-2026 гастрономиялық фестивалі өтеді. Екі күндік іс-шара аясында қымыз байқауы, ұлттық спорт жарыстары, концерттер, көрмелер мен түрлі ойын-сауық бағдарламалары ұйымдастырылады, деп хабарлайды елорда әкімдігінің ресми сайты.
Фестивальдің басты оқиғасы – қымыз байқауы. Онда еліміздің үздік өндірушілері өз өнімдерін ұсынып, келушілер ұлттық сусынды әзірлеу дәстүрімен танысып, қымыздан дәм тата алады. Сонымен қатар ұлттық тағамдарды дайындау бойынша аспаздық шоулар мен шеберлік сабақтары ұйымдастырылып, «Үздік қазы» байқауы өтеді.
Ұлттық спортты сүйетіндер көкпар, бәйге, аударыспақ, дәстүрлі садақ ату жарыстарын, сондай-ақ «Қой көтеру», «Жілік сындыру», ат үстіндегі квиддич және өзге де ұлттық ойындарды тамашалай алады. Ал фестивальдің басты сахнасында екі күн бойы танымал қазақстандық өнерпаздар мен шығармашылық ұжымдар өнер көрсетеді.
Ұйымдастырушылар фестиваль қонақтарына іс-шара өтетін орынға қоғамдық көлікпен келуді ұсынады. Осыған байланысты 7-13 шілде аралығында №18, №37 және №303 автобус бағыттарының қозғалыс сызбасы уақытша өзгереді. Бұл күндері аталған автобустар фестиваль өтетін «Қазанат» ипподромына дейін қатынайтын болады.
Фестиваль билеттерін Ticketon платформасы арқылы сатып алуға болады. Келушілерге бір күндік немесе екі күндік билет таңдау мүмкіндігі ұсынылған. Зейнеткерлер мен 16 жасқа дейінгі балалар үшін кіру тегін.
