Қазақстанда 10 шілдеден бастап орташа жылдамдықты автоматты бақылау жүйесі тағы бес ақылы автожол учаскесінде жұмыс істей бастады, деп хабарлайды QazMonitor Ішкі істер министрлігінің баспасөз қызметіне сілтеме жасап.
Ведомствоның мәліметінше, жаңа жүйе Ақтөбе – Қандыағаш, Алматы – Қорғас, Көкшетау – Петропавл бағыттарында, сондай-ақ Астана – Теміртау және Астана – Щучинск автожолдарының қосымша учаскелерінде іске қосылды. Жаңа қамтылған жолдардың жалпы ұзындығы 525 шақырымды құрайды.
ІІМ Әкімшілік полиция комитетінің ерекше тапсырмалар жөніндегі аға инспекторы Ақтоты Боранованың айтуынша, орташа жылдамдықты бақылау жүргізушілерді жазалау үшін емес, жол-көлік оқиғаларының алдын алу мақсатында енгізіліп отыр.
«Бұл тәсіл қауіпті маневрлердің, күрт үдеу мен тежелудің санын азайтып, жүргізушілерді бүкіл бағыт бойында белгіленген жылдамдық режимін сақтауға ынталандырады. Жылдамдықты шамадан тыс асыру ауыр жол апаттарының негізгі себептерінің бірі болып қала береді», – деді ол.
Еске салсақ, мұндай бақылау жүйесі алғаш рет 2025 жылғы 17 наурызда республикалық маңызы бар сегіз ақылы жол учаскесінде енгізілген болатын. Қазіргі таңда оның қамту аймағын кеңейту жалғасып жатыр.
ІІМ мәліметінше, алдағы уақытта жалпы ұзындығы шамамен 2,5 мың шақырым болатын ақылы жолдардың тағы 14 учаскесін осы жүйеге кезең-кезеңімен қосу мәселесі қарастырылып жатыр.
Сондай-ақ 10 шілдеден бастап Қарағанды – Балқаш – Бурылбайтал және Бурылбайтал – Курты бағыттарында, ал 11 шілдеден бастап Талдықорған – Өскемен автожолында ақылы қозғалыс режимі енгізілді.
