Қазақстандықтар енді Міндетті әлеуметтік медициналық сақтандыру (МӘМС) жүйесіндегі сақтандыру мәртебесін электрондық үкіметтің eGov.kz порталы арқылы тексере алады. Бұл туралы денсаулық сақтау министрлігінің баспасөз қызметіне сілтеме жасап QazMonitor хабарлайды.
Ведомство мәліметінше, министрлік азаматтардың МӘМС жүйесіне қатысуы туралы ақпарат ұсыну жөніндегі мемлекеттік қызмет көрсету қағидаларына өзгерістер әзірледі. Жаңашылдық қызметтің қолжетімділігін арттырып, сақтандыру мәртебесі мен төленген жарналар туралы мәліметті алуды жеңілдетуге бағытталған.
Министрліктің хабарлауынша, жаңа қызмет арқылы азаматтар өздерінің МӘМС жүйесіндегі мәртебесі, сақтандырылған кезеңдері, сондай-ақ өз атына аударылған жарналар мен төлемдер туралы нақты ақпаратты онлайн режимде ала алады. Қызмет eGov.kz порталы арқылы көрсетіледі, сондықтан пайдаланушылар мемлекеттік органдарға бармай-ақ қажетті ақпаратты кез келген уақытта тексере алады.
Қазіргі уақытта Қазақстанда 17,5 млн азамат Міндетті әлеуметтік медициналық сақтандыру жүйесінің қатысушысы саналады. МӘМС аясында сақтандырылған азаматтарға әлеуметтік мәртебесі мен төлеген жарнасының көлеміне қарамастан медициналық көмектің кең спектрі ұсынылады.
Атап айтқанда, жүйе профилактикалық тексерулерді, консультациялық-диагностикалық қызметтерді, амбулаториялық және стационарлық медициналық көмекті, жоғары технологиялық емдеу түрлерін, медициналық оңалтуды және қолданыстағы заңнамаға сәйкес дәрі-дәрмекпен қамтамасыз етуді қамтиды.
Айта кетейік, бұған дейін Қазақстанда МӘМС-тің 2.0 моделі енгізілетіні хабарланған болатын. Оның аясында азаматтар Qalqan платформасы арқылы өздеріне көрсетілген медициналық қызметтер, ауруханаға жатқызу, зертханалық талдаулар, дәрігер тағайындаулары және медициналық шығындар туралы ақпаратты көре алады.
