Қазақстанда өтетін Құрылтай депутаттарының сайлауын бақылауға қатысатын алғашқы халықаралық байқаушылар аккредиттелді. Бұл туралы Орталық сайлау комиссиясының отырысында мәлім болды, деп хабарлайды QazMonitor.
ОСК төрағасының орынбасары Мұхтар Ерманның айтуынша, 1 шілдеде Қазақстан Республикасы Құрылтайы депутаттарының сайлауына халықаралық байқау институтын ашу туралы шешім қабылданған. Осыған байланысты Сыртқы істер министрлігі мен Орталық сайлау комиссиясы бірқатар мемлекеттер мен халықаралық ұйымдарға сайлауды бақылауға қатысу үшін шақыру жолдаған.
«Бүгінгі таңда Орталық сайлау комиссиясына аккредиттеу үшін 3 халықаралық ұйым мен 4 шет мемлекеттің 60 байқаушысының кандидатурасы ұсынылды. Атап айтқанда, ТМД байқаушылар миссиясынан – 4 адам, ТМД-ға қатысушы мемлекеттердің Парламентаралық Ассамблеясынан – 19 адам, ЕҚЫҰ Демократиялық институттар және адам құқықтары жөніндегі бюросының (ДИАҚБ) байқаушылар миссиясынан – 32 байқаушы ұсынылды. Сондай-ақ Мальдив Республикасынан екі кандидатура, оның ішінде осы елдің Сайлау комиссиясы төрағасының орынбасары ұсынылды. Бұдан бөлек, Астанада аккредиттелген дипломатиялық корпустың дуайені – Палестинаның Қазақстандағы елшісі, Венесуэланың Қазақстандағы елшісі және Венгрияның Қазақстандағы уақытша сенімді өкілі де аккредиттелді. Аккредиттеуге қатысты ұсыныстар келіп түсуіне қарай байқаушылар туралы мәліметтер жаңартылып отырады», – деді Мұхтар Ерман.
Отырыс қорытындысы бойынша Орталық сайлау комиссиясының мүшелері шет мемлекеттер мен халықаралық ұйымдардың байқаушыларын аккредиттеу туралы қаулы қабылдады.
