Қазақстан Республикасы Туризм және спорт министрлігі Шығыс Қазақстан облысындағы жеті туристік нысанды жазғы демалысқа арналған үздік бағыттар тізіміне қосты. Олардың қатарында табиғи көрікті жерлер, ұлттық парктер, жағажай және белсенді демалысқа қолайлы орындар бар, деп хабарлайды QazMonitor.
Министрлік ұсынған бағыттардың бірі – Марқакөл көлі мен Марқакөл мемлекеттік табиғи қорығы. Оңтүстік Алтайдағы бұл өңір мөлдір көлімен, биік таулы табиғатымен және ерекше флорасы мен фаунасымен танымал.
Тізімге сондай-ақ Катонқарағай ауданындағы Язевое көлі енгізілді. Биік тауда орналасқан көл Белуха тауына ашылатын көрінісімен, альпілік шалғындарымен және табиғатының бастапқы қалпын сақтап қалғанымен ерекшеленеді.
Жағажай демалысын қалайтын туристерге Ұлан ауданындағы Сібе көлдері мен Бұқтырма су қоймасы ұсынылады. Бұл демалыс орындары құмды жағажайларымен, көркем шығанақтарымен және дамыған туристік инфрақұрылымымен танымал.
Министрлік үздік туристік бағыттар қатарына Риддер қаласы мен Батыс Алтай мемлекеттік табиғи қорығын да енгізді. Бұл аймақтар тау туризміне қолайлы бағыттарымен, қалың тайга ормандарымен, көлдерімен және альпілік шалғындарымен саяхатшыларды қызықтырады.
Күршім ауданындағы Киін-Керіш шатқалы да тізімнен орын алды. Түрлі түсті сазды каньондарымен ерекшеленетін табиғат ескерткіші «Жанып тұрған жартастар» атауымен белгілі.
Тізімді ЮНЕСКО-ның Дүниежүзілік биосфералық резерваттар желісіне кіретін Катонқарағай мемлекеттік ұлттық табиғи паркі толықтырды. Мұнда Белуха тауы, Көккөл сарқырамасы, Берел қорғандары, Рахман қайнары сияқты танымал табиғи және тарихи нысандар орналасқан.
Туризм және спорт министрлігінің мәліметінше, бұл бағыттар ішкі және келу туризмін дамытуға серпін беріп, саяхатшыларға Шығыс Қазақстанның табиғаты мен мәдени мұрасын кеңінен таныстыруға мүмкіндік береді.
