Қазақстан Республикасының Үкіметі Қарағанды қаласының әкімшілік шекарасын өзгерту туралы шешімді мақұлдады. Соған сәйкес облыс орталығының құрамына Бұқар жырау ауданынан жалпы аумағы 281 гектар жер учаскесі қосылады, деп хабарлайды QazMonitor.
Көкпекті стансасының (бұрынғы Солонички) тұрғындары елді мекенді толықтай Қарағанды қаласының қарамағына беруді көптен бері сұрап келген. Бұған дейін тұрғын үйлер Қарағанды қаласының Әлихан Бөкейхан атындағы ауданына қараса, қалған жер аумағы Бұқар жырау ауданының құрамында болған. Көкпекті стансасында 500 адам тұрады, 120 аула мен мектеп бар.
Қала аумағын кеңейту Қарағандының одан әрі дамуына қолайлы жағдай жасап, аумақты тиімді жоспарлауға және инфрақұрылымдық жобаларды іске асыруға мүмкіндік береді.
Әкімшілік шекараның өзгеруі қалалық ортаны кешенді дамытуға, жаңа нысандар салуға, сондай-ақ инженерлік және әлеуметтік инфрақұрылымды одан әрі жетілдіруге жол ашады.
