Қазақстанда ана өлімі 17,5%-ға, жол-көлік оқиғаларынан болатын өлім 20,9%-ға төмендеді. Бұл туралы Денсаулық сақтау министрлігі хабарлады.
Ведомство жартыжылдық қорытындысын шығарды. Денсаулық сақтау бірінші вице-министрі Тимур Сұлтанғазиевтің мәліметінше, жалпы өлім 0,8%-ға, қанайналым жүйесі ауруларынан болатын өлім 10,9%-ға, онкологиялық аурулардан болатын өлім 5%-ға, жол-көлік оқиғалары салдарынан болатын өлім 20,9%-ға төмендеді. Жеті айда ана өлімі 17,5%-ға азайды.
«Денсаулық сақтау жүйесі жұмысының басты нәтижесі – адамдардың өмірі мен денсаулығын сақтау. Оң динамика қабылданып жатқан шаралардың нәтиже беріп отырғанын көрсетеді. Енді осы нәтижені бекітіп, барлық өңірде сапалы медициналық көмектің бірдей қолжетімділігін қамтамасыз ету маңызды», – деп атап өтті Тимур Сұлтанғазиев.
Ана мен бала денсаулығының көрсеткіштері жақсаруда. Жеті айдың қорытындысы бойынша ана өлімі көрсеткіші 100 мың тірі туған балаға шаққанда 9,7-ден 8,0-ге дейін төмендеді. Нәресте өлімі 5,93-ті құрады, жоспарлы көрсеткіш – 7,3. Неонаталдық өлім 3,05 болды, жоспар – 4,1.
Екінші жартыжылдықта негізгі назар жүктілік асқынуларының алдын алуға, әйелдер мен балаларды медициналық бақылау сапасына, патронажға және медициналық көмекті уақтылы көрсетуге аударылады.
Профилактика және ерте диагностикамен қамту артып келеді. МСАК ұйымдарына профилактикалық мақсатта келу үлесі 33,7%-ға, жылдық жоспар – 27%-ға жетті. Онкологиялық скринингтермен қамту 37,6%-дан 42%-ға дейін өсті. Қатерлі ісіктердің ең ерте – 0–I сатыларында анықталу үлесі 34,3%-ды құрады, жоспарлы көрсеткіш – 33,8%.
