Жаңа оқу жылына дайындық аясында денсаулық сақтау министрлігі мектептердің 99%-ын санитариялық-эпидемиологиялық қауіпсіздік талаптарының сақталуына қатысты мониторингпен қамтыды. Оның ішінде мектеп асханаларының 95%-ы және медициналық пункттердің 96%-ы тексерілді. Бұл туралы бүгін Үкімет отырысында Денсаулық сақтау министрі Ақмарал Әлназарова мәлімдеді, деп хабарлайды QazMonitor.
Санитариялық-эпидемиологиялық бақылау қорытындысы бойынша анықталған бұзушылықтарды жоюға қатысты 8,4 мың нұсқама беріліп, жедел ден қоюдың 287 шарасы қабылданды.
13 тамыздағы жағдай бойынша берілген нұсқамалардың 82,8%-ы, яғни 6 961 нысан бойынша талаптар орындалды.
Мектептердегі тамақтану мәселесіне ерекше назар аударылды. Мониторинг барысында мектеп асханаларының 95%-ы немесе 6 338 нысан қамтылды.
«Жаңа оқу жылы басталғанға дейін анықталған бұзушылықтарды толық жоюды қамтамасыз ету қажет. Мектептердегі тамақтану стандартының талаптары мүлтіксіз орындалуы тиіс», – деп атап өтті денсаулық сақтау министрі.
Сонымен қатар 2026 жылғы 1 ақпаннан бастап мемлекеттік бюджеттен қаржыландырылатын балаларға арналған нысандарға мемлекеттік бақылаудың ерекше тәртібі қолданылады.
