Ақтөбе облысында техникалық және кәсіптік білім беру саласындағы мүмкіндіктер кеңейіп келеді. 2026-2027 оқу жылынан бастап Ақтөбе жоғары гуманитарлық колледжі базасында алғаш рет 01130100 – «Логопедия» мамандығы бойынша мамандар даярлау басталады, деп хабарлайды QazMonitor.
Жаңа білім беру бағдарламасы білім беру жүйесі мен балаларды әлеуметтік қолдау саласында сұранысқа ие мамандарды даярлауға бағытталған. Логопедтер балалардың сөйлеу, тіл және коммуникация бұзылыстарын ерте анықтап, түзету жұмыстарын жүргізіп, олардың толыққанды дамуына ықпал етеді.
Қазіргі таңда «Логопедия» мамандығына 125 талапкерден өтініш қабылданған. Конкурс қорытындысы бойынша 11-сынып базасындағы 75 талапкер және техникалық және кәсіптік білім беру базасындағы 25 талапкер мемлекеттік білім беру тапсырысы негізінде білім ала алады.
Білім беру бағдарламасы педагогика және психология негіздерін, инклюзивті білім беруді, логопедиялық зерттеу технологияларын, ауызша және жазбаша сөйлеуді түзету әдістерін, ауыр сөйлеу бұзылыстарымен жұмыс істеуді, сондай-ақ балалардың сөйлеу дағдыларын дамыту тәсілдерін қамтиды.
Оқуды аяқтаған мамандар балабақшаларда, мектептерде, түзету кабинеттерінде, психологиялық-педагогикалық түзету және оңалту орталықтарында, сондай-ақ жеке логопед ретінде жұмыс істей алады.
