Астанадағы «Арғымақ» ат спорты және ұлттық спорт түрлері клубында қала тұрғындарына иппотерапия бойынша сабақтар өткізіледі. 2026 жылдың басынан бері бұл қызметті 586 адам алған, деп хабарлайды QazMonitor Астана әкімдігінің ресми сайтына сілтеме жасап.
«Арғымақ» клубы иппотерапия сабақтарын 2023 жылдың қазан айынан бастап өткізіп келеді. Ол кезде жоба пилоттық режимде іске қосылған. Алғашқы серіктестердің бірі ерекше қажеттіліктері бар балаларды оңалту тәжірибесі бар «Жансая» әлеуметтік қызмет көрсету орталығы болды.
Қазір сабақтарға қала тұрғындарымен қатар «Жансая», «Шарапат» және «Нұрлы Жүрек» әлеуметтік қызмет көрсету орталықтарының қызмет алушылары қатысады.
Сабақтар дүйсенбі, сәрсенбі және жұма күндері үш ауысымда өткізіледі. Клубқа арнайы дайындықтан өткен жеті жылқы бекітілген.
2025 жылы иппотерапия сабақтарынан ерекше қажеттіліктері бар 2 470 бала өтті.
Клубта мамандардың біліктілігін арттыруға да ерекше көңіл бөлінеді. Қызметкерлер үшін иппотерапия әдісі арқылы ерекше қажеттіліктері бар балаларды оңалту бойынша бес оқыту семинары және үш практикалық сабақ ұйымдастырылды. Сонымен қатар мамандар тиісті сертификаттаудан өтіп жатыр.
Сабақтарға жазылуға birge.astana.kz порталы арқылы болады. Курс басталар алдында әр бала алғашқы медициналық тексеруден өтеді. Оның нәтижесі бойынша мамандар жеке оңалту жоспары мен сабаққа қатысу кестесін әзірлейді.
