«Семей медицина университеті» КеАҚ Тәжікстан Республикасындағы Қазақстан медицинасы күндері аясында ғылым және білім беру бағытында бірқатар іс-шара өткізді. Атап айтқанда, медициналық білім беру мен денсаулық сақтау саласындағы заманауи технологияларға арналған мастер-кластар ұйымдастырылды, деп хабарлайды QazMonitor.
Абуали ибни Сино атындағы Тәжік мемлекеттік медицина университетіне барған делегация сапары барысында СМУ студенттерінің цифрлық денсаулық сақтау және жасанды интеллект саласындағы инновациялық әзірлемелері таныстырылды.
Жобалар медицина ғылымдарының кандидаты, қауымдастырылған профессор, ҚР ғылымының еңбек сіңірген қайраткері Т.А. Назарова атындағы физиологиялық пәндер кафедрасының меңгерушісі Сәуле Орынғазықызы Рахыжанованың жетекшілігімен әзірленген.
Іс-шара барысында университет студенттері өз стартап-жобаларын таныстырды. Атап айтқанда, «Онкология» мамандығы бойынша резидент дәрігер Ақылбеков Бақытбек, «Медицина» мамандығының 4-курс студенті Калиев Сернад және «Стоматология» мамандығының 3-курс студенті Акимова Аделия заманауи медицинадағы жасанды интеллект бағытындағы әзірлемелері туралы айтып берді.
Қатысушылардың ерекше қызығушылығын СМУ симуляциялық және білім беру технологиялары кафедрасының меңгерушісі Ж.И. Смағұлова өткізген «XXI ғасыр дәрігерін даярлаудағы симуляциялық технологиялар» тақырыбындағы мастер-класс тудырды.
Мастер-класс барысында медициналық білім беру үдерісінде симуляциялық технологияларды қолдану мүмкіндіктері көрсетілді. Сабақта Леонардо робот-симуляторы пайдаланылды.
