Алматыда 2026 жылғы 5 қыркүйек пен 10 қазан аралығында Арықов көшесінің Жетісу көшесінен Жангелдин көшесіне дейінгі бөлігінде көлік қозғалысы толығымен жабылады. Шектеу жылу магистралін қайта жаңғырту жұмыстарын жүргізуге байланысты енгізіледі. Бұл туралы қалалық Энергетика және сумен жабдықтау басқармасының өкілдері хабарлады.
Сонымен қатар, 12-25 қыркүйек аралығында Арықов және Жангелдин көшелерінің қиылысында көлік қозғалысы уақытша шектеледі. Бұл ретте Жангелдин көшесі толық жабылмайды, шектеу тек оның Арықов көшесімен қиылысатын бөлігіне енгізіледі.
Жөндеу жұмыстары кезінде жүргізушілер Райымбек даңғылы мен Мақатаев көшесі арқылы айналып өте алады. Ал маңайдағы көшелердегі қозғалыс бекітілген жол қозғалысын ұйымдастыру сызбасына сәйкес реттеледі.
Жұмыс жүргізілетін аумақта уақытша жол белгілері, қоршаулар мен бағыттаушы белгілер орнатылады. Мердігер ұйымға жүргізушілер мен жаяу жүргіншілердің қауіпсіздігін қамтамасыз ету міндеті жүктелді.
Қала тұрғындары мен қонақтарынан бағыттарын алдын ала жоспарлап, уақытша шектеулерді ескеріп, жол белгілерінің талаптарын сақтауды сұраймыз.
Уақытша қолайсыздық үшін кешірім сұраймыз және түсіністік танытқандарыңыз үшін алғыс білдіреміз.
