Қазақстанда техникалық және кәсіптік білім беру жүйесінің инфрақұрылымы жаңғыртылып, жастарды заманауи колледждерде оқытуға қажетті жағдайлар жасалып жатыр. Бұл туралы үкімет отырысында оқу-ағарту министрі Жұлдыз Сүлейменова мәлімдеді, деп хабарлайды QazMonitor.
Министрдің айтуынша, жергілікті атқарушы органдар мен жұмыс берушілердің қаражаты есебінен 174 колледж жабдықталған. Сонымен қатар жер қойнауын пайдаланушылардың қолдауымен тағы 13 колледждің материалдық-техникалық базасы жаңартылды.
Алайда еліміздегі 143 мемлекеттік колледждің материалдық-техникалық базасын шұғыл түрде жаңарту қажет.
Саланы одан әрі жаңғырту мақсатында Қазақстанның 11 өңірінде 13 жаңа заманауи колледж салу жоспарланып отыр.
«Бұл өңірлердегі тапшылықты азайтып, жастарымызды заманауи, қажетті құрал-жабдықтармен қамтамасыз етілген ортада сапалы кәсіптік біліммен оқытуға тікелей мүмкіндік береді», – деді Жұлдыз Сүлейменова.
