20 қазаннан бастап «SCAT» әуе компаниясы Шымкент – Сингапур бағыты бойынша жаңа рейсті іске қосады. Рейстер аптасына екі рет орындалады, деп хабарлайды QazMonitor.
Жаңа бағыттың ерекшелігі – қазақстандық әуе компаниясы Қытай аумағы арқылы транзитпен ұшып, «әуе еркіндігінің бесінші дәрежесі» құқығын пайдаланады. Яғни жолаушылар Шымкенттен Қытайдың Санья қаласына ұшып, одан әрі Сингапурға сапарын жалғастыра алады.
Бұл ретте әуе компаниясы жолаушыларды Қазақстан мен Сингапур арасында ғана емес, Қытай мен Сингапур арасында да тасымалдауға мүмкіндік алады.
Министрліктің мәліметінше, Қазақстан мен Сингапур арасындағы әуе қатынасының ашылуы екі ел арасындағы туризм, инвестициялық және іскерлік байланыстарды дамытуға ықпал етеді. Сонымен қатар бұл бағыт Қазақстанның Орталық Азиядағы транзиттік хаб ретіндегі әлеуетін нығайтуға мүмкіндік береді.
