Қазақстанда бір апта ішінде пияз бағасы 5,1%-ға, картоп 3%-ға, сәбіз 2,4%-ға, ақ қырыққабат 2,3%-ға, алма 1,1%-ға, қант 0,7%-ға, сүзбе мен тауық еті 0,4%-ға арзандады. Бұл туралы Ұлттық статистика бюросының деректеріне сілтеме жасап QazMonitor хабарлайды.
Нан, рожки, сиыр еті, қой еті, тауық етінің жекелеген бөліктері, сүт, қаймақ, күнбағыс майы, сары май, тұз және шай бағасы өзгеріссіз қалды.
Өңірлер бөлінісінде әлеуметтік маңызы бар азық-түлік тауарларының жалпы бағасы бір аптада Жезқазғанда 0,3%-ға, Семейде 0,2%-ға, Талдықорғанда 0,1%-ға төмендеді. Астана, Ақтөбе, Атырау, Көкшетау, Қонаев, Орал, Павлодар, Петропавл және Түркістанда бағалар алдыңғы апта деңгейінде сақталды.
Қазақстан бойынша пияздың орташа бағасы килограмына 149 теңгені құрады. Ең төмен баға Павлодарда тіркелді – 119 теңге. Картоптың республика бойынша орташа бағасы килограмына 211 теңге болды. Ең қолжетімді баға Павлодарда – 135 теңге.
Ел бойынша сәбіздің орташа бағасы килограмына 222 теңгені құрады. Ең төмен баға Павлодарда тіркелді – 140 теңге. Қызанақтың орташа республикалық бағасы килограмына 620 теңге болды. Ең қолжетімді баға Таразда – 378 теңге және Атырауда – 396 теңге.
Бір апта бұрын картоп бағасы 6,9%-ға, пияз 5,9%-ға, ақ қырыққабат 5,1%-ға, сәбіз 4,5%-ға төмендеген еді. Сондай-ақ алма бағасы 0,8%-ға, нан 0,4%-ға және ірімшік 0,3%-ға арзандаған.
