Абай облысында қоғамдық тәртіпті қамтамасыз етуге заманауи технологиялар енгізіле бастады. Енді Семей қаласының көшелері мен қоғамдық орындарында полиция қызметкерлерімен қатар робот-иттер де пайдаланылмақ, деп хабарлайды QazMonitor.
Технологиялық құрылғыны алғаш рет полицейлер Семей қаласының орталық алаңына шығарып, тұрғындарға таныстырды. Төрт аяқты робот тұрғындардың назарын аударып, әсіресе балалар мен жастардың қызығушылығын тудырды. Көпшілік жаңа технологияның мүмкіндіктерімен танысты.
Робот-иттер қоғамдық орындарды патрульдеуге, ахуалды бақылауға және құқық бұзушылықтардың алдын алуға көмектеседі. Заманауи бейнебақылау жүйелерімен жабдықталған құрылғы қоршаған орта туралы ақпаратты нақты уақыт режимінде жинап, оны жедел басқару орталығына жібере алады.
Технологиялық құрылғы күмәнді заттарды анықтауға, түтін мен өрт белгілерін тіркеуге мүмкіндік береді. Қауіпті жағдай туындаған кезде робот тиісті дабыл сигналдарын төтенше қызметтерге автоматты түрде жібере алады.
Құқық қорғау органдарының мәліметінше, робот-иттер адамды алмастыру үшін емес, қоғамдық қауіпсіздікті күшейтіп, полиция қызметкерлерінің жұмысын жедел әрі тиімді етуге арналған.
Семейде робот-иттердің қоғамдық тәртіпті қамтамасыз етуге қатысуы өңірде қауіпсіздік саласында заманауи технологияларды қолданудың жаңа бағыты болмақ.
