Қазақстанда жұмыс берушілерге қызметкер еңбек міндеттерін атқарған кезде жазатайым оқиғалардан міндетті сақтандыру (ЖОМС) шартын онлайн режимде өз бетінше рәсімдеуге мүмкіндік беретін жаңа сервис іске қосылды. Бұл қызмет сақтандыру рәсімін жеңілдетіп, жұмыс берушілер үшін оның қолжетімділігін арттыруға бағытталған, деп хабарлайды QazMonitor.
Сервисті Мемлекеттік аннуитеттік компания өз сайтында іске қосты. Енді жұмыс берушілер кеңсеге бармай-ақ және менеджердің көмегіне жүгінбей, шарт жасасудың барлық кезеңінен онлайн өте алады.
Атап айтқанда, пайдаланушы жүйеге тіркеліп, қажетті мәліметтерді енгізеді, сақтандыру құнын есептейді, шартты қалыптастырып, оған қол қояды. Құжаттар мен анықтамалар да белгіленген талаптарға сәйкес тікелей портал арқылы жүктеледі.
Мәліметтердің бір бөлігі мемлекеттік ақпараттық жүйелерден және Бірыңғай сақтандыру дерекқорынан автоматты түрде алынады. Қалған ақпаратты жұмыс беруші өзі енгізеді. Шартқа қол қойылғанға дейін енгізілген деректерді тексеріп, қажет болған жағдайда түзетуге болады.
Шарт жасасу үшін заңды тұлғаның жарамды электрондық цифрлық қолтаңбасы болуы қажет. Негізгі рәсімдердің барлығы бір сайтта жүргізіледі, сондықтан басқа сервистерге ауысудың қажеті жоқ.
«Онлайн-сервистің іске қосылуы, ең алдымен, жұмыс берушілер үшін сақтандыру рәсімін барынша ыңғайлы әрі қолжетімді етуге бағытталған. Рәсімді цифрлық форматта өз бетінше жүзеге асыру уақытты үнемдеуге және кеңсеге бармай-ақ қажетті қызметті алуға мүмкіндік береді», – деді Мемлекеттік аннуитеттік компанияның басқарма төрағасы Олжас Ашкеев.
Жазатайым оқиғалардан міндетті сақтандыру қызметкерлерді әлеуметтік қорғау тетіктерінің бірі саналады. Заңнамада көзделген жағдайларда сақтандыру төлемдері еңбекке қабілеттіліктен айырылуға байланысты келтірілген зиянды өтеуді, сондай-ақ емделуге, медициналық және кәсіптік оңалтуға арналған заңда белгіленген шығындарды өтеуді қамтамасыз етеді.
Қызметкерлерді сақтандыру Қазақстан Республикасы Еңбек және халықты әлеуметтік қорғау министрлігінің негізгі жұмыс бағыттарының бірі болып қала береді. Қазіргі уақытта ЖОМС жүйесімен шамамен 3,5 млн қызметкер қамтылған. Бұл өткен жылмен салыстырғанда 1 млн 130 мың адамға көп.
2026 жылдың соңына дейін ЖОМС шарттарын жасасқан жұмыс берушілердің санын 130 мыңға дейін жеткізу жоспарланып отыр. Жаңа цифрлық сервис жұмыс берушілерге қай өңірде қызмет атқаратынына қарамастан, сақтандыру шарттарын рәсімдеуге қосымша мүмкіндік береді.
Министрлік өндірістік жарақаттанудың алдын алу бағытындағы жұмысты да жалғастырып жатыр. Осы мақсатта кәсіпорындардың қызметін бақылауға арналған цифрлық құралдар қолданылып, жұмыс орындарындағы кәсіптік тәуекелдерді бағалау жүйесі жетілдірілуде.
Осылайша, ЖОМС рәсімдеу үдерістерін цифрландыру жұмыс берушілер үшін сақтандыру қызметтерінің қолжетімділігін арттыруға мүмкіндік береді. Ал өндірістік жарақаттанудың алдын алу шаралары еңбек қауіпсіздігін күшейтіп, жұмыс орындарындағы жарақат алу тәуекелдерін төмендетуге бағытталған.
