Антальяда (Түркия) Әзербайжан, Қазақстан, Түркия және Өзбекстан өкілдері Түркі мемлекеттері ұйымы (ТМҰ) аясында ғарыш өнеркәсібіндегі ынтымақтастық әлеуетін дамыту туралы негіздемелік келісімге қол қойды, деп хабарлайды QazMonitor ҚР Жасанды интеллект және цифрлық даму министрлігінің баспасөз қызметіне сілтеме жасап.
Құжат 5-9 қазан аралығында Түркияда өтіп жатқан 77-ші Халықаралық астронавтика конгресі – IAC 2026 аясында бекітілді.
Келісім ғарыш технологиялары, спутниктер әзірлеу, ғылыми зерттеулер, өндірістік кооперация және мамандар даярлау бағыттарында жүйелі өзара іс-қимыл жасауға негіз қалайды.
Қазақстан үшін бұл бірлескен ғарыш бастамаларына қатысуды кеңейтуге, ТМҰ елдерімен тәжірибе алмасуға, сондай-ақ ғылыми-технологиялық және өндірістік құзыреттерді дамытуға мүмкіндік береді.
ТМҰ Бас хатшысы Кубанычбек Омуралиев келісімге қол қойылуын құптады. Оның айтуынша, құжат Ұйымның түркі әлеміндегі ғылыми, технологиялық және өндірістік ынтымақтастықты дамытуға бейілділігін растайды.
Сонымен қатар ол келісім жаңа бірлескен ғарыш бастамаларын іске асыруға берік институционалдық негіз қалыптастыратынын атап өтті. Сондай-ақ OTS-SAT спутнигін жасау тәжірибесін неғұрлым ауқымды ынтымақтастық үшін пайдалануға мүмкіндік береді.
Ынтымақтастықтың практикалық жобаларының бірі – OTS-SAT. Бұл ТМҰ-ға мүше мемлекеттердің бірлескен жұмысы аясында Астанада «Ghalam» ЖШС әзірлеп жатқан 12U форматындағы спутник.
Жоба ғарыш аппаратын әзірлеуді, оны пайдалануды басқаруды және өңірлік өзара іс-қимылды дамытуды қамтиды. OTS-SAT орбитада технологияларды көрсетуге, сондай-ақ ғарыш жағдайында спутниктік кіші жүйелерге арналған жаңа техникалық шешімдердің жұмыс қабілетін тексеруге арналған платформа болады.
Жоба ТМҰ елдері арасындағы ғарыш саласындағы ынтымақтастықты одан әрі нығайтуға бағытталған.
Аэроғарыш комитеті келісімге қол қойылуын Қазақстанның халықаралық ғарыш ынтымақтастығын дамытудағы және Ұйымға мүше мемлекеттердің ортақ ғылыми, технологиялық әрі өндірістік әлеуетін нығайтудағы маңызды кезең ретінде бағалайды.
