Түркістан қаласындағы арнайы экономикалық аймағында орамдағы полиэтилен пакеттері мен желім (пластик) ыдыстарын шығаратын зауыт іске қосылды. Кәсіпорынның ашылуына Түркістан облысының әкімі Нұралхан Көшеров арнайы қатысып, нысанды аралап көрді.
Жобаға жеке инвестор 4 млрд теңге инвестиция салып, жүзеге асырып жатыр.
«Қазір полиэтилен пакеттері мен бір рет қолданылатын пластикалық ыдыстарға деген сұраныс жоғары. Сондықтан бұл зауыт ішкі нарықты сапалы отандық өніммен толықтырып қана қоймай, экспорттық әлеуетті арттыруға да жол ашады», деді облыс басшысы Н. Көшеров.
Жаңа зауытта 30-дан аса жаңа жұмыс орны ашылды.
Айта кетейік, биылғы 10 айда облыстың негізгі капиталына 1 178,4 млрд. теңге көлемінде инвестиция тартылған. Ал шетелдік инвестициялар көлемі 543,5 млн. АҚШ долларын құрады.
Облыста 2025-2028 жылдар аралығында жүзеге асырылатын 111 инвестжобалар пулы қалыптасқан. Жобалар толық іске асқан жағдайда 23 915 жаңа жұмыс орнын ашу көзделіп отыр.
Дереккөз: Түркістан облысы әкімдігі
