Денсаулық сақтау министрлігі Бас прокуратураның талабы бойынша Қазақстанда 622 стоматологиялық ұйымға жоспардан тыс тексеру жүргізіп жатыр. Бұл туралы Денсаулық сақтау министрі Ақмарал Әлназарова мәлімдеді.
Министр соңғы уақытта, әсіресе жекеменшік стоматологиялық клиникаларда балаларға жалпы наркозбен бірнеше тісті бір мезетте емдеуге қатысты арыздар жиілегенін айтты. Оның сөзінше, балаларды жалпы анестезиямен емдеу – қатаң медициналық көрсетілімдер бойынша ғана жүргізілуі тиіс күрделі медициналық емшара.
«Клиника жекеменшік болсын немесе мемлекеттік болсын мұндай манипуляциялар үшін білікті анестезиологтың қатысуы, тиісті жабдықтардың болуы, анестезиологиялық және реаниматологиялық көмек стандарттарын сақтау талап етіледі. Бас прокуратураның талабы бойынша, ел бойынша стоматологиялық ұйымдарға – барлығы 622 нысанға қатысты жоспардан тыс тексерулер жүргізілуде», деп жазды ол.
Бүгінгі жағдай бойынша 290 тексеру тіркеліп, оның 135 аяқталған. 103 – жұмыс барысында, 26 – тіркеу сатысында, ал 52 клиниканың іс жүзінде жұмыс істемейтіні белгілі болған.
Өңірлердің прокуратурасы жіберген 316 нысанның ішінде 34 клиника МӘМС/ТМККК шеңберінде қызмет көрсетеді, 282 тек ақылы негізде жұмыс істейтіні анықталды.
Министр қазақстандықтарға жалпы анестезия – бұл «ыңғайлы опция» емес, ерекше сақтықты талап ететін күрделі араласу екенін айтып, ата-аналарды ерекше мұқият болуға шақырды.
«Ұзақ наркоз және ауқымды бірмезгілде емдеу баланың жүрек-қантамыр, тыныс алу және жүйке жүйесі тарапынан асқыну қаупін арттыруы мүмкін. Өкінішке қарай, жекелеген клиникалар ата-аналарға коммерциялық тұрғыдан қолайлы нұсқаны ұсынады – «барлық тісті бір ретте емдеп береміз». Алайда мұндай тәсіл тек нақты медициналық көрсеткіштер болған жағдайда, тексерумен расталған кезде ғана орынды», деп қосты Әлназарова.
Сондықтан ведомство басшысы мұндай процедураларға келісім бермес бұрын, тәуекелдер, көрсеткіштер және жүргізу шарттары туралы толық әрі ашық ақпаратпен танысу қажеттігін атап өтті.
