«Азық-түлік келісімшарт корпорациясы» ҰК» АҚ экспорттық партияларды шоғырландыру бағдарламасы аясында Қытайға 7 мың тонна жемдік ұн жөнелтті. Жөнелтуді «Қапшағай бидай өнімдері» ЖШС жүзеге асырды, ал импорттаушы ретінде қытайлық Shandong Hi-Speed Qilu International Port Development компаниясы қатысқан.
Экспорт Қазақстан мен Қытай арасындағы стратегиялық келісімдердің жалғасы болып табылады. Атап айтқанда, жеткізу Қазақстан Республикасы ауыл шаруашылығы министрлігі делегациясының Қытайға сапары барысында қол қойылған келісімдерге негізделген. Тараптар дәнді, жемдік және майлы дақылдарды жеткізуде серіктестікті нығайтуға уағдаласты.
2025 жылы мемлекеттік қолдау шаралары кеңейтіліп, астық өндірушілер мен қайта өңделген өнімдерді жеткізушілерге де қолжетімді болады. Экспортты шоғырландыру бағдарламасы аясында отандық кәсіпорындар Азық-түлік келісімшарт корпорациясының қолдауымен қытайлық серіктестермен жалпы сомасы 29,6 млн доллар болатын 5 келісімшартқа қол қойды. Нәтижесінде Қазақстаннан ҚХР-ға 9 мың тоннадан астам жемдік ұн және 3 мың тонна күнбағыс майы жөнелтілді.
Қытай нарығын дамытуға Азық-түлік келісімшарт корпорациясының Бейжіңдегі өкілдігі белсенді ықпал етті. Ол отандық агроөнеркәсіптік кешендерге шетелдік серіктестер желісін құруға және экспорттық мүмкіндіктерді кеңейтуге көмектеседі.
Ұлттық астық операторының бұл бастамасы Мемлекет басшысының терең қайта өңдеу үлесін 70%-ға дейін арттыру және дайын өнімді шетел нарықтарына жеткізу тапсырмасына сәйкес келеді. Бұл шара елдің азық-түлік қауіпсіздігін нығайтып, ішкі бағаның тұрақтылығын қамтамасыз етпек.
Дереккөз: ҚР АШМ
