Бірыңғай жинақтаушы зейнетақы қоры міндетті зейнетақы жарналары есебінен зейнетақы жинақтарын мерзімінен бұрын пайдалану аясында 2026 жылға арналған ең төменгі жеткіліктілік шектерін белгіледі.
Орташа алғанда шектер 10 пайызға артып, жасына байланысты 3,72-ден 10,7 миллион теңгеге дейін құрады. Мәселен, 20 жастағы қазақстандықтар үшін бұл көрсеткіш 3,72 миллион теңгеге, 30 жастағы азаматтар үшін 5,12 миллион теңгеге, 40 жастағы азаматтар үшін 6,72 миллион теңгеге жетті.
2025 жылға арналған ең төменгі жеткіліктілік шектері 20 жастағы қазақстандықтар үшін 3 260 000, 30 жастағы азаматтар үшін 4 580 000, 40 жастағы азаматтар үшін 6 100 000 теңге болатын.
Еске салсақ, бұған дейін Қазақстан Президенті Қасым-Жомарт Тоқаев 2026-2028 жылдарға арналған республикалық бюджет туралы заңға қол қойды.
Құжатқа сәйкес, 2026 жылдың 1 қаңтарынан бастап келесі мөлшерлер белгіленді:
• ең төменгі жалақы мөлшері – 85 000 теңге (өзгеріссіз)
• айлық есептік көрсеткіш (АЕК) – 4 325 теңге (2025 жылы – 3932 теңге);
• мемлекеттік базалық зейнетақы төлемінің ең төменгі мөлшері – 35 596 теңге (2025 жылы – 32 360 теңге);
• зейнетақының ең төменгі мөлшері – 69 049 теңге (2025 жылы – 62 771 теңге);
• күнкөріс минимумының мөлшері – 50 851 теңге (2025 жылы – 46 228 теңге). Заңмен жас бойынша зейнетақы төлемдеріне және еңбек сіңірген жылдары үшін зейнетақы төлемдеріне бағытталған қаражат 10%-ға көтеруді ескере отырып қарастырылған.
Заң 2026 жылғы 1 қаңтардан бастап қолданысқа енгізіледі. Сонымен қатар БЖЗҚ біржолғы зейнетақы төлемдерін алу тәртібінде 2026 жылы не өзгеретіні туралы айтты.
