Түркістан облысының Ордабасы ауданында орналасқан «Бөрте Милка» тауарлы-сүт фермасын кеңейту жобасы толық аяқталып, жаңа инфрақұрылым толық қуатымен жұмыс істей бастады. Жоба ауыл шаруашылығын жаңғыртуға бағытталған мемлекеттік қолдау шаралары аясында жүзеге асырылды.
Агроөнеркәсіп саласында жасанды интеллект пен «ақылды ферма» жүйелерін пайдалану жануарлардың денсаулығын бақылауға, өндірістің тиімділігін арттыруға және шығындарды азайтуға жағдай жасап отыр.
2023 жылы Ауыл шаруашылығы министрлігі бекіткен қаржыландыру аясында Түркістан облысында сүт фермаларын дамытуға 6 млрд теңге бөлінді. «Бөрте Милка» ЖШС-нің 403 басқа арналған фермасын кеңейту жобасы мақұлданып, жалпы құны 2,8 млрд теңгенің 2,38 млрд теңгесі жеңілдетілген несие арқылы рәсімделді. Несие жылдық 2,5 пайыз мөлшерлемемен 2033 жылға дейін берілген.
Қаражат құрылысқа, заманауи автоматтандырылған жабдықтарға, арнайы техникаға және асыл тұқымды голштин сиырларын сатып алуға жұмсалды. Инвестор қосымша 420 млн теңге жеке қаражатын салып, қора-қопсы мен инфрақұрылымды толықтай жаңартты.
Фермада Швециядан әкелінген VMS-300 маркалы төрт сауу роботы орнатылды. Бұрынғы үш робот та жаңғыртылды. Әр робот сегіз сағатта 70 басқа дейін қызмет көрсете алады. Сонымен қатар 2 000 тоннаға арналған жем-шөп қоймасы салынды.
Жаңғырту нәтижесі айқын: 2024 жылы сүт өндірісі 44 пайызға артса, биыл өсім 60 пайызға жетті.
«Бөрте Милка» жобасы Түркістан облысының сүт өндірісін жаңа деңгейге шығарып, өңірдің агросаласын дамытуға елеулі серпін берді. Ферма бүгінде өңірдегі жетекші сүт өндіру орталықтарының біріне айналды.
Дереккөз: Түркістан облысының әкімдігі
