Олжас Бектенов салалық ведомстволар мен әкімдіктерге ет өнімдерінің бағасын тежеу бойынша нақты шаралар қабылдауды тапсырды. Премьер-министр атап өткендей, азық-түлік инфляциясын төмендетуде ет және ет өнімдерінің бағасы маңызды болып табылады.
«Азық-түлік инфляциясының өсуіне ет және ет өнімдері бағасының үлесін ескере отырып, Сауда, Ауыл шаруашылығы министрліктері мен әкімдіктер аталған өнімдердің бағасын тежеуге ерекше назар аударуы қажет. Сонымен қатар Астана қаласындағыдай, арзандатылған сиыр етін ірі сауда желілері арқылы сату тәжірибесін бүкіл ел аумағында кеңінен қолданған жөн», — деп атап өтті Премьер-министр
Естеріңізге сала кетейік, әлеуметтік маңызы бар азық-түлік өнімдерінің жаңартылған тізіміне қызанақ, қияр, алма, сүйегі бар және сүйексіз сиыр еті, тартылған ет, сүйегі бар қой еті, балғын немесе салқындатылған балық, мұздатылған балық, ультрапастерленген сүт, қаймақ, қатты ірімшік және қара шай енгізілді.
Сауда және интеграция министрлігі жаңа тізімді талқылауға шығарған болатын.
