Мемлекеттік қызметтердің цифрландыруын дамыту және азаматтарға қолжетімділігін арттыру мақсатында «Азаматтарға арналған үкімет» мемлекеттік корпорациясы «ХҚКО» мобильді қосымшасына «Сенімхат рәсімдеу» жаңа цифрлық сервисін енгізді.
Жаңа сервис азаматтарға мамандандырылған ХҚКО-ларда мемлекеттік қызмет алу үшін электронды сенімхаттарды онлайн рәсімдеуге мүмкіндік береді. Қызмет аясында дайын құжаттарды алу, көлік құралдарын тіркеу немесе есептен шығару, техникалық паспортты және мемлекеттік тіркеу нөмірлік белгілерін ауыстыру, сондай-ақ олардың электрондық нұсқасын алу сияқты қызметтерді орындауға болады.
Сенімхат рәсімдеу процесі толықтай онлайн жүзеге асады және бірнеше минутты алады. Электронды сенімхат цифрлық қолтаңба арқылы куәландырылып, құжаттың заңды күшін қамтамасыз етеді және дербес деректердің қауіпсіздігін сақтайды.
«Бұл сервистің іске қосылуы мемлекеттік қызметтердің цифрлық экожүйесін дамытудағы маңызды қадам болды. Азаматтар үшін құжаттарды алу процесін жылдам, қауіпсіз әрі ыңғайлы етіп, алаяқтық әрекеттер мен үшінші тұлғалардың араласу қаупін төмендетеді», – деді «Азаматтарға арналған үкімет» мемлекеттік корпорациясының басқарма төрағасы Арман Кенжеғалиев.
Электронды сенімхат қолдану үшінші тұлғаларға құжаттарды беру қажеттілігін жояды және заңсыз әрекеттердің алдын алады. Мемлекеттік ақпараттық жүйелермен тікелей байланыс деректердің дұрыстығы мен өзектілігін автоматты түрде тексеруді қамтамасыз етеді.
Сервисті пайдалану үшін «ХҚКО» мобильді қосымшасында ЖСН және телефон нөмірі арқылы авторизациядан өту қажет. Қосымша App Store және Google Play платформаларында қолжетімді.
Қызмет ақылы.
Бұл жаңа цифрлық сервис Қазақстан азаматтарына мемлекеттік қызметтердің қолайлылығы мен қауіпсіздігін арттыруға бағытталған.
Дереккөз: Электрондық үкімет
