Қазақстанда резеңке және пластмасса бұйымдарын өндіруге бағытталған инвестициялық жобалар белсенді түрде дамып келеді. Бұл сала өңдеуші өнеркәсіпті нығайту және қосылған құны жоғары өндірістік тізбектерді қалыптастырудың маңызды бағыттарының бірі ретінде қарастырылуда.
Биыл резеңке және пластмасса бұйымдары өндірісі бойынша жеті жоба іске қосылды. «QazIndustry» АҚ Жобаларды іске асыруға мониторинг жүргізу және талдау дирекциясының мәліметінше, аталған жобаларға 14,6 млрд теңге инвестиция тартылып, 200-ден астам тұрақты жұмыс орны құрылды. Атап айтқанда, полимерлі үлдір, вакуумдық және тағамдық қаптамалар, тамшылатып суару ленталары, фитингтер, сондай-ақ ПВХ-дан жасалған қаптама құбырлар өндірісі жолға қойылды.
Сонымен қатар, қазіргі уақытта іске асырудың әртүрлі кезеңдерінде жалпы инвестиция көлемі 46,9 млрд теңгеден асатын 19 жоба бар. Олардың қатарында геомембрана мен геосинтетика, кеңсеге арналған пластикалық бұйымдар, терезе жабындары, құбырлар мен шлангтар, пластикалық ыдыс-аяқ және басқа да өнімдер өндірісі қамтылған. Бұл жобаларды жүзеге асыру нәтижесінде 900-ден астам тұрақты жұмыс орны ашылады, оның ішінде шамамен 250 жұмыс орны ауылдық жерлерде құрылады.
Бұдан бөлек, жұмсақ қаптама, ББПП-пленкасы, ПЭТ-преформа, еуроподдон, қоқыс жәшіктері және өзге де өнімдер өндірісіне бағытталған тағы 13 жоба пысықтау кезеңінде тұр. Жоспарланған инвестициялардың жалпы көлемі 265,2 млрд теңгені құрайды, ал аталған жобалар аясында 1,7 мың жаңа жұмыс орнын ашу көзделіп отыр.
Жалпы алғанда, Қазақстанда резеңке және пластмасса бұйымдары өндірісінің артуы полимер өнеркәсібіндегі жоғары технологиялы бағыттардың дамуына серпін беріп, қаптама саласына арналған жартылай фабрикаттар өндірісін ұлғайтуға, құрылыс материалдарының отандық базасын күшейтуге және импортқа тәуелділікті азайтуға мүмкіндік береді.
Қазіргі және жоспарланған жобаларды қоса алғанда, салада жалпы 39 жоба іске асырылып немесе әзірленіп жатыр. Бұл жобалар аясында шамамен 2,8 мың жаңа жұмыс орнын құру және 362,7 млрд теңге көлемінде инвестиция тарту жоспарланған.
Дереккөз: ҚР Өнеркәсіп және құрылыс министрлігі
