Алматы қаласында Сәтбаев университетінің Физика-техникалық институты базасында орналасқан «Алатау» инновациялық технологиялар паркі арнайы экономикалық аймағында бірден екі жоғары технологиялық өндіріс іске қосылды. Бұл жобалар отандық өнеркәсіпті дамытуға және су қауіпсіздігі мен инфрақұрылымды қорғау салаларында Қазақстанның технологиялық дербестігін нығайтуға бағытталған.
Алғашқы жоба «Мембранэко» компаниясының кері осмос жүйелеріне арналған мембраналық элементтерді сериялық өндіруді көздейді. Жоба ғылым, бизнес және мемлекет арасындағы әріптестік нәтижесінде жүзеге асырылды. Сәтбаев университеті ғылыми сараптама мен зертханалық базаны қамтамасыз етіп, жобаға теңқұрылтайшы ретінде қатысты. Қаржылық қолдауды «Almaty Finance» пен «Самұрық-Қазына» қоры көрсетіп, ұлттық компаниялармен ұзақ мерзімді келісімшарттар жасауға мүмкіндік берді.
Келісімдер аясында отандық өндірісте су тазарту жүйелеріне арналған, RFID-таңбалармен жабдықталған сүзгілеу элементтері жеткізілетін болады. Бұл сүзгілердің қызмет ету мерзімін цифрлық форматта бақылауға мүмкіндік беріп, су дайындау саласын цифрландыруды жеделдетеді. Сонымен қатар жоба импорттық мембраналарға тәуелділікті азайтып, өнеркәсіп пен коммуналдық қызметтерді халықаралық стандарттарға сай жергілікті өніммен қамтамасыз етуге жол ашады.
Жоба жетекшілерінің айтуынша, бұған дейін кері осмос мембраналары толықтай шетелден әкелінген. Енді технологияларды локализациялау арқылы, әсіресе су тапшылығы байқалатын өңірлерде, жоғары сұранысқа ие заманауи шешімдер қолжетімді болмақ. Бұл экологиялық таза технологиялардың дамуына және жаңа жоғары технологиялық жұмыс орындарының құрылуына ықпал етеді.
Екінші жоба – құбырлар мен дәнекерленген қосылыстарды коррозиядан және пайдалану әсерлерінен қорғауға арналған жылумен жиырылатын оқшаулағыш материалдар өндірісі. Бұл өнімдер Қазақстанның климаттық ерекшеліктерін ескере отырып әзірленген. Жоба «Ғылым қорының» қолдауымен «InsulTech» компаниясымен бірлесіп іске асырылып, мұнай-газ, энергетика және коммуналдық инфрақұрылым салалары үшін ұлттық өнеркәсіптік базаны қалыптастыруға бағытталған.
Аталған екі өндірістің іске қосылуы жергілікті өнеркәсіптік әлеуетті арттырып, импортқа тәуелділікті төмендетуге, жоғары технологиялық жұмыс орындарын ашуға және экологияға бағдарланған өнімдер бойынша экспорттық мүмкіндіктерді кеңейтуге мүмкіндік береді.
Дереккөз: ҚР Ғылым және жоғары білім министрлігі
