Минск қаласында Еуразиялық экономикалық одаққа мүше бес елдің бизнес-қоғамдастығының 2025 жылғы жұмысы қорытындыланды. Іс-шара барысында ЕАЭО Іскерлік кеңесіне 2026 жылға арналған төрағалық Қазақстанның «Атамекен» Ұлттық кәсіпкерлер палатасына берілді.
Тиісті шешім ЕАЭО Іскерлік кеңесі төралқасының 27-отырысында қабылданды. Қазақстан тарапы бұл кезеңнің формалды емес, мазмұнды болатынын атап өтті. Ұлттық палата өкілдерінің мәлімдеуінше, төрағалық бағдарламасы Мемлекет басшысы Қасым-Жомарт Тоқаев ұсынған «Жасанды интеллект дәуіріндегі Қазақстан» тұжырымдамасына негізделеді.
2026 жылы ЕАЭО бизнес-қоғамдастығы үшін негізгі басымдықтар ретінде өндірістік процестерге жасанды интеллектті енгізу, трансшекаралық операцияларды цифрландыру және технологиялар арқылы мемлекеттік басқарудың тиімділігін арттыру айқындалды.
Қазақстан Іскерлік кеңес жұмысына технологиялық серпін беруді көздеп отыр. Осы бағыттағы алғашқы қадамдардың бірі – төралқаның келесі отырысын офлайн форматта өткізу. «Атамекен» палатасының басқарма төрағасының орынбасары Тимур Жаркенов кездесуді Шымкент қаласында ұйымдастыруды ұсынды.
Кездесу 2026 жылдың наурызының соңына жоспарланған және Еуразиялық үкіметаралық кеңес аясында өтеді. Ірі көлік және өнеркәсіптік хаб саналатын Шымкентте өтетін басқосу бизнес өкілдеріне тікелей диалог орнатып, нақты келісімдер жасауға мүмкіндік береді.
Дереккөз: Атамекен
