Қазақстанда сұйытылған мұнай газын ішкі нарыққа жеткізу мен бөлудің цифрлық сервисі пилоттық режимде іске қосылды. Жоба Астана мен Шымкент қалаларында, сондай-ақ Батыс Қазақстан облысында тестіленеді.
Энергетика министрлігінде өткен кеңесте «ҚР ішкі нарығына тауар биржаларынан тыс сұйытылған мұнай газын жеткізу және бөлу жоспары» атты цифрлық сервистің пилоттық іске қосылу барысы талқыланды.
Министрлік мәліметінше, жоба сұйытылған мұнай газын бөлу үдерістерінің ашықтығын арттыруға, басқару сапасын жақсартуға және тиімділігін күшейтуге бағытталған.
«Бүгінгі таңда цифрлық сервисті әзірлеудің негізгі кезеңі аяқталды, үдерістің барлық қатысушыларының рөлдері айқындалды, өтінімдерді беру және өңдеу тетігі іске асырылды, сондай-ақ бөлінетін сұйытылған мұнай газы көлемін есептеу автоматтандырылды. Жүйе газ және газбен жабдықтау саласындағы қолданыстағы нормативтік-құқықтық актілерге сәйкес әзірленген», делінген Энергетика министрлігі таратқан хабарламада.
Пилоттық кезең барысында жергілікті атқарушы органдар мен нарық субъектілерінің қатысуымен жүйенің функционалды мүмкіндіктері сынақтан өткізіледі. Бұл есептеулердің дұрыстығын тексеруге, сондай-ақ қатысушылар арасындағы өзара іс-қимылды нақтылауға мүмкіндік береді.
Пилоттау аяқталғаннан кейін жиналған ұсыныстар мен ескертулер талданып, сервисті өнеркәсіптік пайдалануға енгізу алдында қосымша жетілдіру жұмыстары жүргізіледі.
Энергетика министрлігінің бағалауынша, бұл цифрлық шешім сұйытылған мұнай газын бөлудің ашық әрі болжамды тетігін қалыптастыруға және ішкі нарықты тұрақты қамтамасыз етуге ықпал етеді.
Дереккөз: Энергетика министрлігі
