Алматы әкімі Дархан Сатыбалды «Қалқаман» жаңа метро бекетінің құрылыс барысымен және оны қолданыстағы «Бауыржан Момышұлы» бекетімен жалғайтын инфрақұрылымның жай-күйімен танысты. Мегаполис басшысына екі бекет арасындағы сол жақ аралық тоннель көрсетіліп, дайын учаскеде сынақ жүрісі өткізілді.
Әкімдік мәліметінше, қазіргі таңда сол жақ тоннель толық аяқталған. Мұнда түйіспесіз рельс жолы төселіп, жарықтандыру, бейнебақылау, өрт және күзет дабылдары, инженерлік желілер мен дренаж жүйелері орнатылған. Барлық құрылыс-монтаж жұмыстары қолданыстағы қауіпсіздік талаптары мен техникалық стандарттарға сай атқарылған.
Сонымен бірге оң жақ аралық тоннельді қазу жалғасып жатыр. Жоспарланған 1 590 метрдің 1 390 метрі игерілген. Құрылыс тәулік бойы жүріп жатыр, дайын бөліктерінде рельстер төселіп, инженерлік жүйелерді монтаждау қолға алынған.
«Қалқаман» бекетінің өзінде монолитті конструкциялар негізгі кезеңнен өтті. Қазір вестибюль, платформа және техникалық аймақтарда әрлеу жұмыстары жүріп жатыр. Инженерлік жүйелер орнатылып, сәндік элементтерді монтаждау, сондай-ақ эскалаторлар мен жеделсатыларды орнатуға дайындық басталған. Нысанда 470-тен астам маман жұмыс істейді.
Дархан Сатыбалды метро желісін кеңейту қаланың көлік саясаты үшін стратегиялық маңызға ие екенін атап өтті. Жерасты көлігінің дамуы көлік ағынын азайтып, тұрғындардың қозғалыс қолжетімділігін арттыруға мүмкіндік береді.
Жоспарға сәйкес, аталған учаскедегі құрылыс-монтаж жұмыстары 2026 жылдың бірінші жартыжылдығында аяқталып, одан кейін нысан іске қосу-баптау кезеңіне өтеді.
