Түркістан облысында жіп иіру мен мата тоқу бағытына маманданған «Түркістан тоқыма» жауапкершілігі шектеулі серіктестігі (Kazakhstan Lihua) іске қосылып, өндірістік қызметін бастады. Бұл нысан өңірдегі ең ірі тоқыма кәсіпорындарының бірі саналады.
Жаңа кешен жоғары қосылған құны бар тоқыма өнімдерін шығаратын қазіргі заманғы өндірісті қалыптастыруды, сондай-ақ мақта шикізатын ел ішінде терең өңдеу үлесін арттыруды көздейді. Бұл ішкі өндірістік тізбекті нығайтуға мүмкіндік береді.
Жобаның жалпы инвестициялық көлемі 86,2 млрд теңгені құрайды. Құрылыс жұмыстары 2024 жылы басталып, 2025 жылы өндірістің алғашқы кезеңі іске қосылды.
Жоспарға сәйкес, 2026 жылдың желтоқсанына дейін жобаның тағы үш өндірістік кезеңін аяқтау көзделген. Осы уақыт ішінде кешеннің барлық қуаты толық іске қосылады. Толық жүктемеге шыққан жағдайда кәсіпорын жылына 11,4 мың тонна иірілген жіп, 47,3 млн шаршы метр мата, 2 млн дана төсек-орын жиынтығы және 4 млн көрпе өндіретін болады.
Жобаны жүзеге асыру нәтижесінде Қазақстанның жеңіл өнеркәсібіндегі импортқа тәуелділік едәуір азайып, ішкі нарық сапалы отандық өніммен қамтамасыз етіледі. Сонымен қатар, өндірістік қуат экспорттық бағытты дамытуға және елдің сыртқы нарықтағы бәсекеге қабілеттілігін арттыруға жол ашады.
