Қазақстанның IT-секторы экспорттық тұрғыдан жаңа межеге шықты. Үкіметтің бір жылдағы жұмысының қорытындысына арналған баспасөз мәслихатында Премьер-министрдің орынбасары – жасанды интеллект және цифрлық даму министрі Жаслан Мәдиев елдің IT-экспоры 1 млрд долларға жеткенін мәлімдеді.
Қазіргі таңда Astana Hub алаңы шамамен екі мың IT-компанияны біріктіреді. 2025 жылы хабтың географиясы кеңейіп, Қазақстан аумағында 20 өңірлік және шетелде 4 халықаралық сайтты қамтыды. Экожүйеге қатысушылардың жиынтық табысы 800 млрд теңгеге жетіп, бір жылда 20%-ға артқан.
Министрдің айтуынша, халықаралық хабтар арқылы 100-ден астам қазақстандық стартап сыртқы нарықтарға шықты. Бұл қазақстандық IT-компаниялардың жаһандық бәсекеге қабілеттілігін арттырып, экспорттық түсімдерді ұлғайтуға мүмкіндік берді. Сонымен қатар экожүйеде өңір үшін алғашқы технологиялық «сыңармүйіз» компания пайда болды. Higgsfield.ai стартапының жоғары бағалануы Қазақстан стартап нарығының сапалы жаңа кезеңге өткенін көрсетеді.
Венчурлық қаржыландыруды дамыту да басым бағыттардың бірі ретінде айқындалды. Осы мақсатта жоспарлы капиталы 1 млрд доллар болатын Qazaqstan Venture Group құрылды. Қазіргі уақытта құрылым 115 млн доллар көлемінде инвестиция тартқан. Бұл құрал отандық стартаптардың ерте кезеңнен бастап ауқымды жобаларға дейін өсуіне қаржылық қолдау көрсетуді көздейді.
Бұған дейін Qazaqstan Venture Group алғашқы жабылу раундында $115 млн тартқаны хабарланған болатын.
