2025 жылы 1 657 қазақстандық оқушы 36 халықаралық пәндік олимпиада мен ғылыми байқауға қатысып, жалпы саны 922 медаль жеңіп алды.Қатысушылардың 60 пайызы жүлдегер атанып, әрбір екінші оқушы халықаралық білім додаларынан олжалы оралды, деп хабарлады QazMonitor-ға «Дарын» РҒПО баспасөз қызметі.
Жыл қорытындысы бойынша еліміздің оқушылары 177 алтын, 329 күміс және 416 қола медаль еншіледі. Сонымен қатар, ұлттық құрама команда жеті беделді халықаралық олимпиадада бақ сынап, 27 медаль иеленді. Оның ішінде 4 алтын, 13 күміс және 10 қола жүлде бар.
Астаналық оқушы Нұргүл Егенбергенова Азия физика олимпиадасында «Үздік қыз қатысушы» атанса, Маңғыстау облысының оқушысы Мендіғали Қалдыбай химия пәні бойынша Менделеев олимпиадасында зертханалық жұмыстардан үздік нәтиже көрсетіп, «Үздік практик» атағына ие болды. Ал Астанадағы ФМБ Назарбаев зияткерлік мектебінің оқушысы Мұхтархан Батырхан экономика пәнінен халықаралық олимпиадада абсолютті жеңімпаз атанды.
Бұдан бөлек, биылдан бастап халықаралық ғылыми байқауларда жеңімпаз атанған оқушылар мен олардың ғылыми жетекшілеріне бір реттік сыйақы беру қарастырылған.
