Үкімет Ақтөбе облысында алкогольсіз сусындар өндіретін жаңа зауыт салу жөніндегі инвестициялық келісімді мақұлдады. Тиісті қаулыға Премьер-министр Олжас Бектенов қол қойды. Жоба Мемлекет басшысының өңдеу өнеркәсібін дамыту және тікелей инвестициялар тарту жөніндегі тапсырмаларын іске асыру аясында жүзеге асырылады.
Инвестор ретінде «Кока-Кола Алматы Боттлерс» БК ЖШС белгіленген. Компания өңірде заманауи өндірістік кешен салуға 41,9 млрд теңге инвестициялауды жоспарлап отыр. Кәсіпорынның жобалық қуаты жылына 280 млн литр алкогольсіз сусын шығаруға есептелген.
Жаңа зауытта халықаралық стандарттарға сай озық технологиялар қолданылады. Атап айтқанда, өндірістік қалдықтарды басқарудың экологиялық қауіпсіз жүйелері енгізіледі. Бұл шешім кәсіпорынды елдегі тұрақты өнеркәсіптік экожүйеге тиімді интеграциялауға мүмкіндік береді.
Жобаның әлеуметтік-экономикалық әсері де айтарлықтай. Зауыт іске қосылғаннан кейін өңірде 120-дан астам жаңа жұмыс орны ашылады. Бұл Ақтөбе облысындағы еңбек нарығына қосымша серпін беріп, жергілікті кадрларды өндірістік секторға тартуға жағдай жасайды.
Құрылыс жұмыстары 2026 жылы басталады деп жоспарланып отыр. Үкіметтің бағалауынша, жоба өңдеу өнеркәсібіндегі инвестициялық белсенділікті арттырып қана қоймай, Қазақстанның алкогольсіз сусындар нарығындағы өндірістік әлеуетін күшейтеді.
Еске салсақ, бұған дейін Қазақстан Үкіметі шетелдік инвесторлардың қатысуымен 5,7 трлн теңгеге портфель жасақтаған болатын. Бұл жобалар 11 мыңнан астам жұмыс орны ашуға мүмкіндік береді.
Сонымен қатар түрік инвесторы Қазақстандағы екі қант зауытына 500 млн доллар инвестиция салатыны белгілі болды. Зауыт жылына 300 мың тонна өнім шығарады деп жоспарланған.
Айта кетейік, Қазақстанда инвестициялық ахуалды жақсартуға бағытталған институционалдық өзгерістер іске асырылып жатыр. Мемлекет басшысының Жарлығымен Қазақстанда инвесторлардың құқықтарын қорғау комитеті құрылды. Сондай-ақ Инвестициялық омбудсменнің функциялары Бас Прокурорға жүктеліп, өңірлерде инвестициялық прокурорлар институты енгізіледі.
