Алматыдағы Әл-Фараби атындағы Қазақ ұлттық университетінде 5000 орындық бес жаңа жатақхананың қазығы қағылды. Қытайлық инвесторлардың қолдауымен жүзеге асатын бұл ауқымды жоба студенттердің баспана мәселесін түбегейлі шешіп қана қоймай, университет қалашығының инфрақұрылымын халықаралық деңгейге көтеруді көздейді.
ҚазҰУ қалашығын дамытудың II кезеңі аясында тоғыз қабатты бес жаңа жатақхананың құрылысы ресми түрде басталды. Салтанатты шараға университет басшылығы, белгілі түлектер, профессор-оқытушылар құрамы және инвестор ретінде тартылған Қытайдың «Чжунтайхуа» Баоцзи құрылыс еңбек қызметтері компаниясының» өкілдері қатысты.
Рәсім барысында болашақ ұрпаққа арналған арнайы капсула жер қойнауына тапсырылды. Әл-Фараби атындағы ҚазҰУ-дың ректоры Жансейіт Түймебаев бұл жобаның стратегиялық маңызын атап өтті.
«2022 жылы ҚазҰУ қалашығы құрылысының екінші кезеңі басталған болатын. Жаңа жатақханалар жастардың білім алуына, ғылыми-зерттеу жұмыстарына және әлеуметтік бейімделуіне оң әсерін тигізеді», деді ол.
Жобаның жалпы инвестиция көлемі шамамен 33,8 миллиард теңгені құрайды. 66 мың шаршы метрді алып жатқан кешен халықаралық стандарттарға сай заманауи қауіпсіздік жүйелерімен және жайлы тұрмыстық инфрақұрылыммен жабдықталады.
Құрылыс жұмыстары 2026 жылдың қаңтарында басталып, бір жарым жыл ішінде аяқталады деп жоспарланып отыр. Бұл қарқынды жұмыс кестесі студенттердің баспана тапшылығын қысқа мерзімде шешуге мүмкіндік береді. Болашақ ұрпаққа жолданған хатта жобаның негізгі миссиясы айқындалған.
«Біз ҚазҰУ-ды дамыту мен жаңғыртудың жаңа дәуірінің табалдырығында тұрмыз. Бұл – сапалы білім алуға, ғылыми қызметті дамытуға және студенттік өмірді жаңа деңгейге көтеруге тың мүмкіндіктер ашатын тарихи сәт. Студенттік жатақханалар құрылысы аясында атқарылып жатқан барлық жұмыстар білім алушы жастар мен университеттің профессор-оқытушылар құрамы үшін лайықты, заманауи және жайлы жағдайлар жасауға бағытталған. Осы жатақханаларда тұрып, университет қабырғасында білім алған студенттер еліміздің дамуы мен өркендеуіне елеулі үлес қосатынына нық сенеміз», делінген онда.
