Президент Қасым-Жомарт Тоқаев Қазақстан халқын Жаңа жылмен құттықтауында еліміздің даму бағыттарын айқындап, келесі жылды «Цифрландыру және жасанды интеллект жылы» деп жариялады.
Мемлекет басшысы ел дамуының стратегиялық басымдықтары мен алдағы маңызды өзгерістер туралы мәлімдеме жасады. Президенттің айтуынша, алдағы конституциялық реформа мен экономикалық жаңғыру ел болашағы үшін шешуші рөл атқармақ.
«2026 жылы Қазақстан жаңғырудың жаңа кезеңіне қадам басады. Еліміздің жарқын келешегі үшін алдағы конституциялық реформаның мән-маңызы зор. Азаматтарымыз Қазақстанның өсіп-өркендеуіне тың серпін беретін бұл реформаны қолдайды деп сенемін», деді Президент.
Мемлекет басшысы ел экономикасын нығайтудың негізгі бағыттарын атап өтті. Атап айтқанда: энергетикалық әлеуетті арттыру, су шаруашылығы мен агроөнеркәсіп кешеніндегі мәселелерді шешу, көлік-логистика саласын дамыту, ТҮКШ жүйелерін жаңғырту және жолдарды жөндеу. Сонымен қатар барлық өңірде жаңа кәсіпорындар ашылып, мектептер, ауруханалар, спорт және мәдениет нысандарының құрылысы жалғасатынын атап өтті.
Бұған қоса ол заманауи технологиялардың маңыздылығына тоқталып, жаңа жылдың атауын бекітті.
«Мен биылғы Жолдауымда Цифрлық мемлекет болуымыз керектігін жарияладым. Сондықтан келесі жылды Цифрландыру және жасанды интеллект жылы деп атау туралы шешім қабылдадым. Озық технологиялар еліміздің барлық саладағы әлеуетін арттыруға жол ашпақ», деді Тоқаев.
Оның сөзінше, мемлекеттің әлеуметтік міндеттемелері өзгеріссіз қалады. Өскелең ұрпаққа қамқорлық жасау аясында «Ұлттық қор – балаларға» жобасы табысты жүзеге асырылуда. Биыл үшінші жыл қатарынан әр баланың жеке есепшотына қаражат аударылады.
Сондай-ақ, шағын және орта бизнесті қолдау, білім беру мен денсаулық сақтау салаларын дамыту мемлекеттің басты назарында қала бермек.
