Қазіргі уақытта елде АИ-92 маркалы бензиннің бағасын көтеруге мораторий күшінде қалып отыр. Бұл шара инфляциялық қысымды тежеу мақсатында енгізілген. Жанармай бағасының күрт өсуі күтілмейді, жағдай мемлекеттің бақылауында, деп хабарлады QazMonitor-ға ҚР Энергетика министрлігінің баспасөз қызметі.
Министрліктің хабарлауынша,2027 жылдан бастап Еуразиялық экономикалық одақ аясында мұнай және мұнай өнімдерінің ортақ нарығын қалыптастыру процесі кезең-кезеңімен жүзеге асады және ең алдымен заңнамаларды үйлестіруді көздейді. Бағалардың басқа елдермен автоматты түрде теңестірілуі туралы сөз жоқ. Кез келген интеграциялық үдерістер барысында Қазақстан азаматтарының әлеуметтік жағдайы мен ұлттық мүдде басты басымдық болып қала береді.
Ведомство объективті нарықтық факторларды да ескермеуге болмайтынын айтады. Көршілес елдермен арадағы баға айырмашылығы арзан жанармайдың заңсыз сыртқа шығарылуына, яғни «сұр» экспортқа жол ашып, ішкі нарықта жасанды тапшылық қаупін тудырады. Бұдан бөлек, қазіргі төмен бағалар салаға инвестиция тарту мүмкіндігін шектеп отыр. Ал мұнай өңдеу саласына Шымкент, Атырау және Павлодар мұнай өңдеу зауыттарын кеңейту, сондай-ақ төртінші мұнай өңдеу зауытын салу үшін қомақты қаражат қажет.
Министрлік мораторий аяқталғаннан кейін нарықтық бағаға көшу үдерісі біртіндеп жүзеге асатынын жеткізді. Барлық шешімдер экономикалық жағдай мен халықтың табысын ескере отырып қабылданады және тұтынушылар үшін күрт өзгерістерге жол берілмейді.
