Алматы облысы Еңбекшіқазақ ауданының Ават ауылында лимон өсіруге бағытталған заманауи жылыжай кешені іске қосылды. Бұл – аудан аумағында цитрус дақылдарын өнеркәсіптік негізде өсіруге бағытталған алғашқы жоба, деп хабарлайды QazMonitor.
Жобаның жалпы аумағы – 1 гектар. Кәсіпкер Юрий Паскаловтың мәліметінше, жылыжай құрылысына және инженерлік инфрақұрылымға шамамен 500 млн теңге жеке инвестиция салынған. Кешенге 1200 түп лимон көшеті отырғызылды.
«Бұл көшеттерді Шымкент қаласынан әкелдім. Қазіргі таңда жылыжайда тамшылатып суару технологиясын пайдаланып отырмыз. Кешен көгілдір отын арқылы бірқалыпты температурада жылытылып тұр. Қазір екі көмекшім бар. Егер ойдағыдай баптап-күтсек, екі жылдан кейін алғашқы өнімін көреміз», деді кәсіпкер.
Агроөндірістік кешен жыл бойы жұмыс істеуге бейімделген. Мұнда:тамшылатып суару жүйесі, көгілдір отынмен жылытылатын температуралық бақылау, жазғы кезеңге арналған салқындату технологиялары орнатылған.
Бұл шешімдер өнімнің тұрақты шығымдылығын қамтамасыз етуге мүмкіндік береді.
Кәсіпкердің айтуынша, лимон ағаштары екі жылдан кейін өнім бере бастайды. Алғашқы кезеңде бір түп ағаштан 25–30 кг өнім алу көзделіп отыр. Бұл бір гектардан 30–36 тоннаға дейін өнім алуға мүмкіндік береді. Ағаштар толық жетілген кезде бір түптің өнімділігі 100 кг-ға дейін жетуі мүмкін. Бұл жағдайда жылдық жалпы өнім көлемі 100 тоннадан асуы ықтимал.
Қазақстанда лимон өнімінің едәуір бөлігі сырттан тасымалданады. Облыс әкімдігі жергілікті өндірістің дамуы логистикалық шығындарды азайтуға, өнім бағасының тұрақтануына және өңірлік агробизнестің әртараптануына ықпал етеді.
Айта кетейік, алдағы уақытта кәсіпкер жылыжай аумағын 5 гектарға дейін кеңейтуді жоспарлап отыр. Бұл инвестиция көлемін арттырып, өңірдегі ауыл шаруашылығы өндірісінің құрылымын кеңейтуге мүмкіндік береді.
