Қырғызстанда өтетін VI Дүниежүзілік көшпенділер ойынының ресми бағдарламасына қазақтың көкпары енгізілді. Бұл туралы Қазақстан Көкпар федерациясының президенті Айдарбек Қожаназаров мәлімдеді, деп хабарлайды QazMonitor.
Оның айтуынша, шешім Туризм және спорт министрлігімен бірлесіп, қырғызстандық әріптестермен жүргізілген келіссөздер нәтижесінде қабылданған. Көкпар мен көкбөрі қазақ пен қырғыз халықтарының ұлттық болмысын айқындайтын маңызды спорт түрлері екені атап өтілді.
Бұған дейін ойындардың ресми тізімінде көкпардың болмауы қоғамда кеңінен талқыланған болатын. Ал өткен жылы жарияланған бағдарламада тек көкбөрі енгізіліп, көкпар шет қалған еді. Бұл мәселе басқа да қатысушы елдер үшін өзекті болды, өйткені көкпар Қазақстаннан бөлек Моңғолия, Өзбекстан, Тәжікстан, Ауғанстан сияқты бірқатар мемлекеттерде кең таралған.
VI Дүниежүзілік көшпенділер ойындары 2026 жылғы 31 тамыз бен 6 қыркүйек аралығында Қырғызстанда өтеді. Жарыс бағдарламасына 43 ұлттық спорт түрі енгізіліп, ойындарға шамамен 100 елдің қатысуы күтіледі.
