Алматынң хайуанаттар бағында 8–18 қаңтар аралығында өткен «Шыршаны тапсыр» экологиялық акциясы аяқталды. Шараға қала тұрғындары мен бірнеше гүл дүкенін қоса алғанда, 50-ден астам адам қатысқан, деп хабарлайды QazMonitor.
Алматы хайуанаттар бағының ғылыми-әдістемелік бөлімінің басшысы Ақжами Елеманованың айтуынша, мұндай бастамалар жануарлардың мінез-құлқын байытуда маңызды рөл атқарады.
«Жануарлар үшін бұл қорек қана емес, сонымен бірге мекен ету ортасын жақсартуда маңызы зор: вольердегі әрбір жаңа зат – жаңа иіс, жаңа дәм және зерттеуге мүмкіндік», – деді Елеманова.
Акция аясында алматылықтар жаңа жылдық табиғи шырша, майқарағай және қарағай ағаштарын зообаққа өткізді. Жиналған қылқанжапырақты ағаштар жануарлардың мекен ету ортасын байытуға бағытталды. Атап айтқанда, тұяқты жануарлардың кей түрлері үшін бұл — қосымша азық көзі болса, маймылдар, жолбарыстар, аюлар мен леопардтар үшін табиғи «ойыншық» ретінде қолданылды.
Сонымен қатар шырша бұтақтары харзаларға, атжалмандарға, кірпілерге және жайраларға жұмсақ төсеніш қызметін атқарды. Тапсырылған ағаштардың ішінде тамыр жүйесі сақталған үш шырша бар. Олар хайуанаттар бағы аумағына отырғызылмақ.
