Әбілқас Сағынов атындағы Қарағанды техникалық университетінде шағын биогаз қондырғысы іске қосылды. Жаңа нысан жылына 7 тоннаға дейін органикалық қалдықты өңдеуге қабілетті және студенттердің ғылыми-зерттеу жұмыстары мен практикалық даярлығына арналған тәжірибелік алаң ретінде пайдаланылмақ, деп хабарлайды QazMonitor.
Бастаманың негізгі мақсаты – өңірде жасыл экономика қағидаттарын дамыту және экологиялық технологияларды білім беру процесіне енгізу. Биогаз қондырғысы университетке Орталық Азияның Тұрақты дамуы қоғамдық қорының Creative Innovation Institute бастамасы аясында тапсырылған. Аталған қор Германия экономикасының Орталық Азиядағы өкілдігі ұйымдастырған байқауда жеңімпаз атанған.
Қор сарапшысы Александра Харитонованың айтуынша, қондырғы цифрлық білім беру құралдарымен интеграцияланған, бұл студенттерге экологиялық шешімдерді тәжірибе жүзінде зерттеуге мүмкіндік береді.
Биогаз қондырғысы тәулігіне 2 текше метрге дейін биогаз өндіреді және жыл сайын 18 тонна CO₂-эквивалентінің атмосфераға шығарылуын азайтуға ықпал етеді. Өңдеу нәтижесінде алынатын дигестат университет аумағын көгалдандыруда пайдаланылып, қоршаған ортаға түсетін экологиялық жүктемені төмендетеді.
ҚарТУ-дың ғылым және инновациялар жөніндегі проректоры Әли Мехтиевтің айтуынша, жоба қолданбалы ғылымды дамытуда маңызды рөл атқарады.
«Жобаны жүзеге асыру университеттегі тәжірибеге бағытталған ғылым мен инновацияны дамытуда үлкен рөл атқарады. Ол білім беру, зерттеу және тұрақты даму саласындағы заманауи технологияларды көрсету мүмкіндігін біріктіреді», деді Мехтиев.
