Қазақ ұлттық аграрлық зерттеу университетінің ғалымдары мультиақуыздық құрамға негізделген құрама жем өндіру әдісін жасап жатыр, деп хабарлайды QazMonitor.
Жобаның негізгі мақсаты – қымбат ақуыздық компоненттерді алмастырып, экономикалық тұрғыдан тиімді әрі биологиялық құнды жем өндірісін жолға қою. Бүгінде дәстүрлі ақуыз қоспаларының қымбаттауы агросектордағы шығындарды арттырып, өнімнің бәсекеге қабілеттілігіне кері әсер етуде.
Жаңа технология аясында жануар тектес шикізатты, соның ішінде ет өңдеу өнеркәсібінің қалдықтарын – ет-сүйек, қан және сүйек ұнын, сондай-ақ гидролизаттарды пайдалану ұсынылады. Бұл компоненттер толыққанды ақуыз бен алмастырылмайтын аминқышқылдарының көзі болып табылады.
Ғалымдар әзірлеп жатқан шешім әртүрлі физика-химиялық қасиеттері бар шикізатты тиімді өңдеуге бағытталған. Атап айтқанда, ұсақтау және араластыру процестерін оңтайландыру арқылы құрама жемнің біртектілігі мен қауіпсіздігін қамтамасыз ету көзделген.
Технология құрамына пробиотикалық қоспалар енгізу де қарастырылған. Бұл малдың ас қорыту жүйесін жақсартып, қоректік заттардың сіңуін арттыруға және өнімділікті көбейтуге мүмкіндік береді.
Жобаны іске асыру нәтижесінде құрама жемнің өзіндік құны төмендейді, азықтың қорытылу тиімділігі артады, сондай-ақ қайталама шикізатты пайдалану арқылы экологиялық жүктеме азаяды.
