Қазақстанның әйелдер арасындағы жекелей сында бірінші ракеткасы Елена Рыбакина Australian Open – 2026 турниріндегі сәтті өнерін жалғастыруда, деп хабарлайды QazMonitor. Турнирдің ширек финалында әлемдік рейтингте бесінші орында тұрған қазақстандық теннисші әлемнің екінші ракеткасы, польшалық теннисші Ига Швентекпен кездесті.
Матч 1 сағат 35 минутқа созылып, Рыбакинаның 7:5, 6:1 есебімен жеңісімен аяқталды. Кездесу барысында ол 11 эйс орындап, үш қос қателік жіберді және жеті брейк-пойнттың төртеуін сәтті пайдаланды. Өз беруінде қазақстандық спортшы қарсыласына небәрі бір гейм ғана берді.
Бұл нәтиже Рыбакинаға мансабында екінші рет Австралияның ашық чемпионатының жартылай финалына шығуға мүмкіндік берді. Келесі кезеңде ол америкалық теннисшілер – WTA рейтингінде тиісінше алтыншы және төртінші орындарда тұрған Джессика Пегула мен Аманда Анисимова арасындағы кездесудің жеңімпазымен ойнайды.
Елена Рыбакинаның Australian Open турниріндегі ең үздік нәтижесі – 2023 жылғы финал. Ол кезде қазақстандық теннисші Арина Соболенкоға жол берген еді. Беларусь спортшысы биылғы маусымда да жартылай финалға шығып, финалға жолдама үшін украиналық Элина Свитолинамен кездеседі.
