Үндістанның астанасы Дели қаласында өтіп жатқан нысана көздеуден Азия чемпионатында Қазақстан құрамасы екі алтын медаль иеленді, деп хабарлайды QazMonitor. Жарыста София Шульженко жеке және командалық сында үздік нәтиже көрсетті.
Әйелдер арасында 50 метр қашықтықтан пневматикалық винтовкамен үш позицияда нысана көздеуден өткен жеке жарыста София Шульженко жеңіске жетті. Финалда ол 358,2 ұпай жинап, әлем және Азия рекордын жаңартты. Осылайша, қазақстандық мерген бұл жаттығуда ересектер мен жасөспірімдер санатында рекорд иесі атанды. Күміс және қола жүлделер Үндістан спортшыларына бұйырды.
Командалық есепте София Шульженко, Арина Малиновская және Елизавета Безрукова финалда өнер көрсетіп, 1760 ұпаймен бірінші орынды иеленді. Қазақстан әйелдер құрамасы құрлық чемпионатында толық басымдық танытты.
Айта кетейік, Азия чемпионаты ересектер, жастар және жасөспірімдер санатында өтуде. Биылғы бәсекеге Азияның 20 елінен 320 спортшы қатысып жатыр. Қазақстан құрамасы атынан үш жас санатында 47 мерген сынға түсуде. Ересектер құрамасының бас бапкері — Ольга Довгун. Жарыс 13 ақпанда аяқталады.
