Қазақстандық теннис тарихында тұңғыш рет еліміздің төрт өкілі бірден әлемдік рейтингтердің ТОП-10 қатарына енді, деп хабарлайды QazMonitor Қазақстан теннис федерациясының баспасөз қызметіне сілтеме жасап.
Әйелдер құрамасының көшбасшысы Елена Рыбакина WTA рейтингінде 3-орында тұрақты түрде келеді. Ол жоғары санаттағы турнирлерде нәтижелі ойын өрнегін көрсетіп жүр. Биылғы маусымды Рыбакина сәтті бастап, Australian Open турнирінде чемпион атанды. Финалда әлемнің бірінші ракеткасы Арина Соболенконы (Беларусь) 6:4, 4:6, 6:4 есебімен сенімді түрде жеңді.
Ерлер арасында Александр Бублик ATP рейтингінің 10-сатысына көтеріліп, қазіргі заманғы теннистегі ең жарқын әрі креативті ойыншылардың бірі мәртебесін нығайтты.
Жұптық разрядта Анна Данилина айтарлықтай табысқа жетіп, WTA doubles рейтингінде 6-орынға тұрақтады. Бұл — спортшының мансабындағы рекордтық көрсеткіш және Қазақстанның әлемдік жұптық теннистегі позициясын күшейткен маңызды нәтиже.
Жасөспірімдер арасында Заңғар Нұрланұлы ITF Juniors рейтингінің үздік ондығына еніп, тарихи жетістікке қол жеткізді.
Сарапшылардың пікірінше, бұл нәтижелер қазақстандық теннисшілердің жаһандық аренадағы бәсекеге қабілеттілігінің артқанын айқын көрсетеді. Сондай-ақ бұл жетістік елдегі теннис инфрақұрылымын дамыту мен жүйелі дайындық жұмыстарының тиімділігін дәлелдейді.
