Алматыда Ұлттық киім күніне орай ерекше форматтағы мерекелік іс-шара өтті. Қала тұрғындары мұз айдынына ұлттық киім киіп шығып, жаппай сырғанады, деп хабарлайды QazMonitor.
Мерекелік кеш бір уақытта үш нысанда: Алматы Арена, Халық Арена және Олимпик кешендерінде ұйымдастырылды. Іс-шара мегаполис тұрғындары мен қонақтарының үлкен қызығушылығын тудырды.
Келушілер үшін мұз айдынында тегін сырғанау мүмкіндігі ұсынылды. Қатысушылар ұлттық киім киіп, мұз үстінде ерекше атмосфера қалыптастырып, кеш ұлттық нақышқа толы, жарқын әрі әсерлі өтті.
Қонақтарға тегін тағам ұсынылып, мерекелік көңіл-күй одан әрі артты. Қала тұрғындары іс-шараға отбасымен, достарымен және балаларымен келіп, демалып, естелік суреттерге түсіп, әсерлерімен бөлісті.
Көпшілік бұл форматтың тың әрі шабыт сыйлағанын атап өтті. Ұйымдастырушылардың айтуынша, мұндай бастамалар спортты дәріптеп қана қоймай, адамдарды біріктіріп, салауатты өмір салтын және ұлттық құндылықтарды насихаттауға ықпал етеді.
