Алматыда қалалық Спорт басқармасының бастамасымен жүзеге асырылып жатқан ALMATY MOVE жобасы аясындағы тегін спорттық жаттығулар жалғасып жатыр. Жоба бұқаралық спортты дамытуға және тұрғындар арасында салауатты өмір салтын насихаттауға бағытталған, деп хабарлайды QazMonitor.
Өткен жексенбіде қаланың екі саябағында өткен ашық жаттығуларға 100-ге жуық алматылық қатысты. Таңғы сағат 09:00-де 28 гвардияшы-панфиловшылар атындағы саябақта йога сабағы ұйымдастырылса, дәл осы уақытта Тұңғыш Президент қоры саябағында стретчинг бойынша жаттығу өтті.
Қатысушылар демалыс күнін таза ауада белсенді өткізіп, денсаулығын нығайтуға мүмкіндік алды. Алматы қаласы Спорт басқармасының мәліметінше, мұндай бастамалар спортты баршаға қолжетімді етіп, тұрғындардың бос уақытын тиімді ұйымдастыруға ықпал етеді.
Жоба алдағы уақытта да қаланың әртүрлі аудандарында жалғасады. Тегін жаттығулардың өтетін орны мен уақыты туралы ақпарат ALMATY MOVE жобасы мен Алматы қаласы Спорт басқармасының Instagram желісіндегі ресми парақшаларында жарияланып отырады.
