Спорт пен дене шынықтыруды дамыту Мемлекет басшысы айқындаған мемлекеттік саясаттың басым бағыттарының бірі болып табылады. Негізгі басымдық ұлт денсаулығын нығайтуға, бұқаралық, балалар мен жасөспірімдер спортын кеңейтуге, сондай-ақ спорттағы жетістіктер арқылы Қазақстанның халықаралық беделін арттыруға бағытталған.
Президент тапсырмаларын іске асыру аясында елімізде жүйелі әрі кешенді шаралар қабылданып жатыр. Әсіресе азаматтардың тұрақты түрде спортпен айналысуына қолайлы жағдай жасауға ерекше назар аударылуда.
Балалар үшін спорттық секциялардың қолжетімділігін арттыру мақсатында жан басына шаққандағы ваучерлік қаржыландыру тетігі енгізілді. Бұл ата-аналарға қосымша шығынсыз үйірмелер мен секцияларды еркін таңдауға мүмкіндік береді, ал оқыту шығындары мемлекеттік бюджет есебінен өтеледі.
2024 жылдың қорытындысы бойынша дене шынықтыру және спортпен жүйелі түрде айналысатын халық үлесі 41,4 пайызды құрады. Ал 4 пен 17 жас аралығындағы балалар мен жасөспірімдер арасында бұл көрсеткіш 30,4 пайызға жетіп, 5,1 миллионнан асты.
Сонымен қатар, спорттық инфрақұрылымды дамыту бағытында ауқымды жобалар жүзеге асырылуда. 2024 жылы еліміз бойынша 90 жаңа спорт нысаны пайдалануға берілді. Оның 61-і ауылдық жерлерде, 29-ы қалалар мен аудан орталықтарында орналасқан. Бұған қоса, тағы 32 нысанның құрылысы аяқталды.
Биыл Түркістан қаласындағы ескек есу каналы, Қызылорда қаласындағы футбол стадионы және Астана қаласындағы Ұлттық спорт университеті сынды бірқатар маңызды нысандардың құрылысын аяқтау жоспарланып отыр. Жаңа университет спорттың жоғары жетістіктері саласында білікті жаттықтырушыларды, менеджерлерді, спорт психологтарын және ғылыми кадрларды даярлауға арналған жетекші базаға айналады.
Сала мамандарының мәртебесін арттыру және кәсіби ынталандыру мақсатында 2026 жылдан бастап ұлттық стандарттарға сай жұмыс істейтін және біліктілік сынағынан өткен жаттықтырушылардың лауазымдық жалақысына 30 пайыз көлемінде үстемеақы енгізіледі.
Мемлекет басшысының тапсырмасына сәйкес, 2020 жылдан бері спорттық бағыттағы педагог қызметкерлердің еңбекақысы жыл сайын 25 пайызға өсіп келеді. 2024 жылға қарай жалақының жиынтық өсімі 100 пайызды құрады. Сонымен қатар, 2022 жылдан бастап дене шынықтыру және спорт саласындағы мамандардың базалық еңбекақысы кезең-кезеңімен арттырылуда.
Саланы жаңғыртудың маңызды кезеңі ретінде Туризм және спорт министрлігі әзірлеген жаңа заңның 2025 жылғы 16 маусымнан бастап күшіне енуі атап өтіледі. Құжат басқару жүйесін күшейтуге, қаржыландыру тетіктерін жетілдіруге және нормативтік-құқықтық базаны оңайлатуға бағытталған.
Дереккөз: ҚР Спорт және туризм министрлігі
