Қазақстанда жүзеге асырылған «Бөлектау» геймификацияланған экосоқпақ жобасы халықаралық деңгейде мойындалып, IN SITU зерттеу жобасының ғылыми комитеті тарапынан іріктелді, деп хабарлайды QazMonitor.
Отандық тәжірибе 2026 жылғы 11-13 мамыр күндері Валмиера қаласында өтетін Culture Matters Here: Cultivating Creative Place-Based Innovation in Non-Urban Communities халықаралық конференциясында ұсынылады.
Зерттеуді жобаның негізін қалаушылар Ирина Харитонова мен Александра Харитонова таныстырады.
IN SITU жобасы мәдениет пен креативті индустрияларды цифрлы технологиялар, тұрақты туризм және жергілікті экономикамен ұштастыра отырып, шағын қалалар мен ауылдық аумақтардың дамуына ықпалын зерттейді.
«Бөлектау» жобасы табиғи аумақтардың тұрақты туризм, экологиялық ағарту және цифрлы шешімдер тоғысқан инновациялық алаңға айнала алатынын көрсететін жарқын мысал ретінде бағаланды. Бұл бастама Орталық Азиядан зерттеу аясында қарастырылған алғашқы жобалардың бірі болды.
Айта кетейік, «Бөлектау» экосоқпағы Бурабай мемлекеттік ұлттық табиғи паркі аумағында орналасқан. Бұл – Қазақстандағы алғашқы интерактивті жаяу жүру бағыты. Соқпақ 2025 жылдың қыркүйегінде ашылып, QR-кодтар, үш тілдегі аудиогид және Telegram-бот арқылы туристерге ыңғайлы цифрлы шешімдер ұсынады.
Жоба Home Credit Bank, «Бурабай» ұлттық паркі және Ақмола облысының туризм басқармасы арасындағы әріптестік негізінде жүзеге асырылған.
