Абай облысы бойынша 2026-2028 жылдарға арналған Алакөл жағалауында туризмді дамыту жол картасы бекітілді, деп хабарлайды QazMonitor. Құжат өңірдің туристік әлеуетін арттыруға және жағалаудағы инфрақұрылымды кешенді дамытуға бағытталған.
Жоспарға сәйкес бас жоспар әзірленіп, инженерлік инфрақұрылым жаңартылады. Электр желілері тартылып, су және кәріз жүйелері салынады, тазарту қондырғылары орнатылады. Сонымен қатар жағалау нығайтылып, санитарлық тораптар мен жарық жүйелері іске қосылады.
Биыл көл жағалауына жасанды интеллектпен интеграцияланған 115 бейнекамера орнатылады. Оның 22-сі қауіпсіздікті қамтамасыз ету үшін жағалау сызығында орналастырылады. Сондай-ақ барлық нысандар жоғары жылдамдықты интернетпен қамтылып, талшықты-оптикалық байланыс желісі тартылады.
Бұдан бөлек, жолдар жөнделіп, қоғамдық көлік қозғалысы ұйымдастырылады. Туризмді дамыту аясында келу орталығын салу, инвесторлар тарту және мәдени-туристік іс-шаралар өткізу жоспарланған.
Алакөл жағалауын дамыту және 2026 жылдың жазғы маусымына дайындық бойынша арнайы жиында облыс әкімі Берік Уәли басшысы шомылу маусымына екі айдай ғана уақыт қалғанын атап өтіп, инфрақұрылымды дамыту, қауіпсіздік пен тазалықты қамтамасыз ету және қызмет көрсету сапасын арттыру жұмыстарын жеделдетуді тапсырды.
